காமேனியின் படுகொலை: ஈரான், மேற்காசியாவின் எதிர்காலம் என்ன?

மேற்காசியப் பிராந்தியத்தில் கடந்த சில நாட்களாக அரங்கேறிவரும் நிகழ்வுகள் உலகையே உலுக்கியுள்ளன. ஈரானின் உயர் தலைவர் (Supreme Leader) அயதுல்லா அலி காமேனியையும் அவரது குடும்ப உறுப்பினர்களையும் இலக்கு வைத்து நடத்தப்பட்ட ராணுவ நடவடிக்கையின் மூலம், அமெரிக்காவும் இஸ்ரேலும் இப்பிராந்தியத்தில் ஒரு கட்டுப்படுத்த முடியாத வன்முறைச் சுழலைத் தொடங்கிவைத்துள்ளன.

உயிரிழந்துள்ள அயதுல்லா காமேனி வகித்துவந்த ‘உயர் தலைவர்’ பதவி, ஈரானிய அரசியலின் மிக உயர்ந்த அதிகாரப் பீடமாகும். அவர் இறைவனால் நியமிக்கப்பட்டதாகக் கருதப்படும் உன்னத ஆன்மீகத் தலைவராகவும் போற்றப்படுகிறார். 1979இல் நடைபெற்ற இஸ்லாமியப் புரட்சிக்குப் பிறகு, அயதுல்லா கொமேனி அந்தப் பொறுப்பை ஏற்றார். அவருக்குப் பிறகு 1989 முதல் அயதுல்லா அலி காமேனி உச்ச தலைவராக ஆதிக்கம் செலுத்தி வந்தார். ஈரானின் ராணுவம், வெளியுறவுக் கொள்கை என அனைத்திலும் இறுதி முடிவெடுக்கும் அதிகாரம் இவருக்கே இருந்தது.

காமேனியின் மறைவுக்குப் பிந்தைய ஈரான் எப்படி இருக்கும்? அவரது படுகொலை மேற்காசியப் பிராந்தியத்தில் ஏற்படுத்தப்போகும் விளைவுகள் என்ன? இக்கேள்விகளுக்கு விடை காண்பதற்கு நாம் சில முக்கியப் புள்ளிகளைப் பரிசீலிக்க வேண்டும்.

குலையாத அதிகாரம்

ஈரானின் உச்ச அதிகாரப் பதவியில் இருந்த காமேனியோடு சேர்த்து, பல முக்கிய அரசியல், ராணுவ மற்றும் உளவுத் துறைத் தலைவர்களும் கொல்லப்பட்டுவிட்டனர். இருப்பினும், ஈரானின் மதகுருமார்களை மையமாகக் கொண்ட அதிகாரக் கட்டமைப்பு இதனால் முழுமையாகச் சீர்குலைந்துவிடவில்லை. எஞ்சிய தலைவர்கள் உடனடியாக மாற்று ஏற்பாடுகளைச் செய்யத் தொடங்கிவிட்டனர். இடைக்கால உயர் தலைவராக அயதுல்லா அராஃபி நியமிக்கப்பட்டுள்ளார். இவருடன் இணைந்து அரசை வழிநடத்த ஈரானின் அதிபர் மற்றும் உச்ச நீதிமன்றத் தலைமை நீதிபதி ஆகியோரை உள்ளடக்கிய ‘மூவர் குழு’ அமைக்கப்பட்டுள்ளது.

ஈரானியர்களின் மனநிலை

1989இல் காமேனி பொறுப்பேற்றபோது இருந்த சூழல் இப்போது இல்லை. ஈரானிய மக்களிடையே மதகுருமார்களின் ஆட்சி மீது பொருளாதார மற்றும் அரசியல் ரீதியான அதிருப்தி நிலவுகிறது. மக்கள் எதிர்பார்க்கும் கடுமையான மாற்றங்களைச் செய்யாவிட்டால், இந்த ஆட்சி நீண்ட காலம் நீடிப்பது கடினம். ஆனால், மற்றொரு விஷயத்தையும் கவனத்தில் கொள்ள வேண்டும்; தற்போது மக்களிடையே அதிருப்தி இருந்தாலும், வெளிநாட்டுத் தாக்குதலின் மூலம் தங்கள் நாட்டின் உயரிய தலைவர் கொல்லப்பட்டிருப்பதால், அவர்கள் தேசிய உணர்வோடு நாட்டின் பக்கம் ஒன்றுபட வாய்ப்புள்ளது.

மத மோதல் அபாயம்

தலைமை கொல்லப்பட்ட சில மணி நேரங்களிலேயே இஸ்ரேல் மீதான ஈரானின் ஏவுகணைத் தாக்குதல்கள் அதிகரித்துள்ளன. ஈரானின் இந்தப் பதிலடித் தாக்குதல் பல நாடுகளுக்குப் பரந்து விரிந்ததாகவும், கண்மூடித்தனமானதாகவும், மிக ஆபத்தானதாகவும் உள்ளது. குறிப்பாக, ஜெருசலேமில் உள்ள 'அல்-அக்ஸா' மசூதி அருகே ஏவுகணை ஒன்று விழுந்துள்ளது. இது இஸ்லாமிய மதத்தின் மூன்றாவது முக்கியப் புனிதத் தலமாகக் கருதப்படுகிறது. இங்கிருந்துதான் நபிகள் நாயகம் சொர்க்கத்தை அடைந்தார் என்பது இஸ்லாமியர்களின் நம்பிக்கை. இத்தகைய புனிதத் தலங்கள் தாக்கப்பட்டால், அது உலகளாவிய மத மோதலாக உருவெடுக்கும் அபாயம் உள்ளது.

ஷியா பிரிவு முஸ்லிம்களின் வரலாற்றில் ‘தியாகம்’ என்பது மிக உயர்ந்த இடத்தைப் பெற்றுள்ளது. காமேனியின் படுகொலையை ஈரானிய மதகுருமார்கள் ஒரு ‘புனித தியாகமாகச்’ சித்தரிக்கத் தொடங்கிவிட்டனர். அவரை ஷியாக்களின் முதல் இமாமான ‘இமாம் அலி’யுடன் (நீதிக்காகப் போராடி உயிர்நீத்தவர்) ஒப்பிடுகின்றனர். இத்தகைய ஒப்பீடுகள் ஈரானிய மக்களிடையே பழிவாங்கும் உணர்வைத் தூண்டி, போரை இன்னும் நீண்ட காலத்துக்கு நீட்டிக்கச் செய்யும் என்று பலரும் அச்சம் தெரிவிக்கின்றனர்.

நண்பர்களை எதிரியாக்கும் பதிலடி

ஈரான் நடத்திய பதிலடித் தாக்குதலில் வளைகுடா ஒத்துழைப்பு கவுன்சிலில் (GCC) உள்ள சவுதி அரேபியா, ஐக்கிய அரபு அமீரகம், குவைத், பஹ்ரைன், ஓமன் மற்றும் கத்தார் ஆகிய ஆறு நாடுகளுமே பாதிக்கப்பட்டுள்ளன. அங்குள்ள அமெரிக்க ராணுவத் தளங்களைக் குறிவைத்து நடத்தப்பட்ட இத்தாக்குதல்கள், அந்தந்த நாட்டுப் பகுதிகளையும் சேதப்படுத்தியுள்ளன; சில உயிரிழப்புகளையும் ஏற்படுத்தியுள்ளதாகத் தகவல்கள் வெளியாகியுள்ளன.

1979 ஈரானியப் புரட்சி காலம் முதலே, மற்ற அரபு நாடுகள் ஈரானை எதிர்த்தபோதும் ஓமன் மட்டும் நடுநிலை வகித்து வந்தது. அமெரிக்காவுக்கும் ஈரானுக்கும் இடையே ஒரு முக்கிய சமாதானத் தூதுவராகச் செயல்பட்ட ஓமன் மீதே இப்போது ஏவுகணைகள் விழுந்துள்ளன. அதேபோல், 2017-2021 காலகட்டத்தில் அரபு நாடுகள் கத்தாரைப் புறக்கணித்தபோது ஈரான் உதவியது. அப்படிப்பட்ட நட்பு நாட்டின் மீதும் ஈரான் இப்போது தாக்குதல் நடத்தியுள்ளது. இக்காரணங்களால், இது மீண்டும் ‘அரபு - பாரசீக’ மோதலாகவோ அல்லது ‘சன்னி - ஷியா’ மோதலாகவோ உருவெடுக்க வாய்ப்புள்ளது.

வெளியிலிருந்து திணிக்கப்படும் மாற்றம்

ஈரானில் மத அடிப்படைவாத ஆட்சியிலிருந்து மக்களை விடுவிப்பதே இந்தத் தாக்குதலின் நோக்கம் என ட்ரம்ப் கூறுகிறார். ஆனால், ஒரு நாட்டின் ஆட்சி மாற்றம் என்பது வெளியாட்களால் திணிக்கப்படுவதில்லை. 1979 இஸ்லாமியப் புரட்சி மக்கள் பல ஆண்டுகள் ரத்தம் சிந்திப் போராடிப் பெற்றது. அதேபோல், தற்போதுள்ள ஆட்சியை வீழ்த்த வேண்டுமானால் மக்கள் வீதியில் இறங்கிப் போராட வேண்டும்; அதற்கான விலையை மக்களே கொடுக்க வேண்டும். ஆனால், தற்போதைய சூழலில் மக்கள் அத்தகைய பெரிய அளவிலான போராட்டங்களில் ஈடுபடுவதற்கான அறிகுறிகள் தென்படவில்லை.

முடிவின்றித் தொடரக்கூடிய போர்

ஈரான், இஸ்ரேல் மற்றும் அமெரிக்கா ஆகிய மூன்று தரப்புகளுமே தங்கள் ராணுவ நடவடிக்கைகளைக் குறைப்பதற்குப் பதிலாக, அவற்றை மேலும் தீவிரப்படுத்தவும் விரிவுபடுத்தவும் உறுதிபூண்டுள்ளன. இதனால், தற்போதைய போருக்கு உடனடி முடிவு ஏற்படுவதற்கான அறிகுறிகள் எங்கும் இல்லை. சுருக்கமாகச் சொன்னால், ட்ரம்ப் - நெதன்யாகு கூட்டணி தொடங்கிவைத்த வன்முறைச் சுழலை மீண்டும் கட்டுக்குள் கொண்டுவருவதும், இந்தப் போருக்கு ஒரு முற்றுப்புள்ளி வைப்பதும் அத்தனை எளிதான காரியமல்ல.